طلال حيدر.......مختارات

اضحك فالموت يمازحك ما دام كل مرة يخطئك ليصيب مَ دام
نيتشه
مَ دام
مَ دام
نوم ولادهن
طيّر ورق بالسهل
مَ دام
ما عاد بدهن يخلّوا الصبي
يدقدق جراس النحل
مَ دام
إيديك البيوت الفاضية
مَ دام
ما بقا في حدا
غير القفاص العالية
وغير الصدى
مَ دام
بس تلملمي دَيكي بيتلملموا طراف الحقول
مَ دام........ مهما قلت
رح اسكت ع طول ...ما عاد بدي قول

فوق
كان في غصن بردان
ع مرجة هلي
سألتن لمين الطقس
قالوا لي إلي
وطلعت اتفقد إذا ردوا البواب
وبقيت فوق
وما حدا قلي نزلي

مي
كتبوا تاريخ المي
على ذاكرة الينابيع
كيف بدا المي تضيع
.......
في نجمة بقيت لحالا
ما عرفت ترجع
لو ما تطلع مقبالا
بالمي وتلمع
هـ الكان عندن بيت
هـ الكان عندن بيت
وصورة عليها ناس
معلقين بخيط
وقعوا عن سطوح العمر
وسْتلَقِتن الحجار
وِقعوا متل ما بيوقع المشمش
على ولاد الزغار
وين أهلي ؟
وين طاحونة حزن خيي الزغير ؟
وين طيارة ورق نومي
على هزّة سرير ؟
وين الإيدين ؟
الحطّت ابريق الشتي فوق الحصير
وين شبابيك
الفات منها الصوت
متل الزمهرير
وين رمّان السقف
مقطوف ومعلّق
متل عُمر الكبير
لك......عنّ يا قلبي
متل هـ النحل
جُوّات القفير
وقع العمر
ما بين إيد
وبين هزّات السرير
1972
سهيان
كان الطقس سهيان
ما بباله حدا
متل اللي قاعد ع الهوا
يتذكر النسيان
وما ضل في غير الزمان
وصندوق فرجة
وكل ما مرق فرجة
بيقولو كان .....
بلاد مقوّصة
نِمْتِ
فْتَكْوكِ ولد غفيان
تحت المي
قرّبوا منّك يحاكوكِ
لقيو بحيرة مي
وجّك متل رجعة ولد
بعد الغياب
وجّك
متل تلة
وعم تصرخ دياب
يا عُمرْ
مابيلحق يجي تيروح؟!
وجّك
متل بيرق عزا
من بعيد عم بيلوح
إنتِ
بيت أهلي
إنتِ
ورد عم إرفعُهْ
تَسيّج الحقلي
إنتِ بلاد مقوّصَهْ
وعم تنقتل قَبْلي
إنت
وهبّط يا منام
ووعّيا متلي
واقف على سهل البقاع
ملَتّم بشمله
بصرّخ
وصوتي ضايع
وقالوا الهوا قِبلي
يا بيت أهلي
يا سطيحات الحمام
يا دعس عالي
فوق تلجات المنام
سيف
يا مِن حلب
يا مِن الشام
هـ الحنة شمالية
حنّيت إيديك
يا بو خطوط محنية
بيلبقلك التوب
والشملة الشامية
لك سحاب سيفك وغني
بتلبقلك الغنّيهْ
مكتوب ع السيف
والكلمات كوفية
مكتوب حبيت
الباقي حروف ممحية.
........
.
لا تجعلوا من الحب قيداً
بل اجعلاه بحرا ًمتدفقا بين شواطئ روحيكما
جبرانً

مينُن هنّ
لبسوا الكفافي ومشوا
وما عرفت مينن هنّ
ما عاد رح يرجعوا
يا قلب حاج تعن
لا حصان جايب حدا
ولا سرج عم بيرنّ
لك ضحاك
سٍنَّك دهب
خلّيِهْ يبان السن
خلّيكْ متل القصب
كل ما عتق بيحن
يا بن اسمك حلو
سميت حالي بن
رَدْ العبايه القصب
ع الكتف
محبوبي
والعين قوس القدح
وسيوف مسحوبه
راحوا
لبسوا العتم!
قامات مهيوبة
ناديت
بالله رجعوا
ما تلفّتوا صوبي
شرق شمال
وصلنا على مشارف حماه
نواعيرها ناحوا
فارقتهن شرقي حلب
ما عرفت وين راحوا....

عندما يلمس الرجل بيده يد امرأة
يلمس كلاهما قلب الأبدية
نيتشه
ريش نعام
حلوة متل طلّوا االعرب
رح يوصلوا ع الشام
وجك قبيلة بيعدت
ما وصلا الإسلام
وجك متل حقلة قمح
نيال يللي نام
دقّوا مهابيج البكي
وهدول يا طير الحمام
بيناتنا قوس القدح
منصوب متل خيام
ومن فوق قوسك يا دني
عم توقع الإيام
بيناتنا قولة غفي
والموت ريش نعام
سلّم ع موتك يا هلي
بيطلعلنا نودّي سلام
خلص اللي بيني وبينكن
عم شوف متل منام
جمال وبدو رح يرحلوا
وبِحكي وما بيطلع كلام
ركوة عرب
أحلى من الركوة
على منقل عرب
أحلى من الفنجان
حلوة متل عبي القصب
خيط القصب تعبان
عْلِيتِ
متل خرج الدهب
صرتِ سهل حوران
جيبوا حدا من دمّر
يدقدق وشم
جيبوا من الهامة
والوشم
بن محمّص
وهبّ الهوا شامي
غمازة العالخد
ما إلها اسم ؟
والخد قدامي
ومكحّلي...
والكحل راسمها رسم
مين البرا قلامي
ومشنشلي متل الفرس
والسرج إسلامي
أربع جواري
يحملوا بريق العطر
وابْرقهن شامي
بإيدا أساور من دهب
بتخش
بتخش ؟
بيدور الطرب
ليوم القيامة
حزن المدينة
اوعا تسمّوها
بتحزن ميدنة
بيوقع ادان العصر
وبينسرق سيف النبي
وما بيلتقى بمصر
إنت الشام مزينة
وغنت قواس النصر
وقفوا العرب ع سلاحهن
لمن فردت الشَعْر
تمنيت حالي دهب
تاصير متل الشام
وتغار مني حلب
وما عود فيي نام
ه الموت ع ضهر الفرس
مارق بها الإيام
والناس
ع كتر النعس
كل ما مرق بتنام
جفلة فرس
محني متل برج الأسد
رمّانٍك العالي
جايبلك بحرجي دهب
يرخصلك الغالي
شكّيت حدّن قصب
تيضلّن ببالي
كلّن
أساميهن هلا
وإسمي أنا زوالة
هـ العمر جفلة فرس
والناس خيالة
حطّيتن بوجّ الهوا
وهب الهوا شمالي
عتمة خيالة
لو كان عندي فرس
لضلّ ع العالي
بس نّدهيني
بنزل على خيالي
يا بنت راعي الغنم
هـ الموت مقبالي
ردّوا معي البواب
جايي هوا شمالي
في ناس
قالوا قتِل
في ناس
قالوا مات
في ناس
قالوا فتح عتمة خيالة
وفات...
تفاحة
قولولهن
هيدي السنة
يملّوا جرار المي
والميّ جاي من الفرات
كتير مرتاحة
وكل ما خلق عندن صبي
بتحمرّ تفاحة
بتنسى حالا بالشمس
بنرجع بنفوق إنها بيضا
أبيض من حليب النوق
متل المي المحرورة
وصار بدا تروق
خْوالي الأرض البعل
وعمومتي شو بعلبك بها السهل؟
أهلي!
سرقوا العسل
وما عاد حدا بيعرف بسرّ النَحل
التمر استوى
وعم يوقع من كتر السكر
بين فخاد البنت البكر
بين الغزالة والنوم
الوعل الدكر
المهيّج من أول يوم
جايي من اليمن السعيد
كرمال الربع الخالي
أحلى من اليمن السعيد
وأحلى
من اللي ببالي....
مرج الغزال
بغيبتك نزل الشتي
قومي طلعي ع البال
في فوق سجادة صلا
والعم بيصلوا قلال
صوتن متل مصر المرا
وبعلبك الرجّال
ع كتر ما طلع العشب بيناتنا
بيرعى الغزال
وَدّيت مع راعي حماة
يشفلي الطقس شمال
قللي السنة جايي هوا
بيوَقّع الخيال
يا ريت
ما سرجت الفرس
ولا بْعَتْ هـ المرسال
الله.. الله
بتلبقلِك المي
لا تموتي
اْغرقي بالمي
تيصير موتِك نَعَس
وتْصير
شمسك فَيّ
وجّك جنازة
والملك مقتول
والعسكر قبالي
في ناس
عم بيحوربوا بقصر الملك
وفي ناس
ع العالي
خوفي عليك تكبري
وخوفي على حالي
رح تنزل عليّ الدني
ويتْغرّق خيالي
و ن كان
لا بدّ وغنى ورح ترحلوا
محّوا الطريق
مرسوم ع الحيطان
ولا حفيان
راكض بالحريق
قومي نعسيلُهْ يا دني
بلكي إذا نْعستي
بيفيق
يللي نطرته وجع
طلع الصبح صبحين
شمّيت ريحة علي
قالوا
مرق الحسين
جيبُه بيارق كربلا
وسماع ملّلا آه
فردوا البيارق بالهوا
قال الهوا
الله
الله.....الله....
فتحلي درفتين ال ه
وخللي الهوا
بال ه
وجك أدان الصبح
والفاتحة اسمك
و ال تا المربوطة
شريطة على رسمك
وبتقول خبيني ؟
بخبيك ما بين الحمد و الفاتحة
بغطيك بالرحمن
من بعد ما بايده
رفع للمي بكربلا
تيشرب العطشان
قللا لها المي نزلي
من سورة الرحمن
ليش هيك صرتي كتار
و بعدك ما حدا
وحلوة
مَرّة متل هـ الصيف حفيانة
و مَرّة متل شي بلاد كسلانة
و مَرّة
متل غمِّض وقبل ما تفتِّح انساني
أول ما شفت النهر عم بيطوف
عرفت أي منام
بدي شوف


غنيّة ميّالا
لا لا يا عمّو لا لا
في وحدة اسما ميالا
جايي من ضيعة بعيدة
حتى تغني موالا
قدْ ما زعلوها الناس
فاتت قعدت بخيالا
أنا زرعتا صفصافة
وهي استحت لحالا...
نون
إلى فيروز
مشتاق
ايدييّ غمر مفتوح متل النون
معجّّل
متل جملة ما فيها سكون
ولا بنْهدى
والوقت ما عنده وقت ينطر حدا
يمكن أنا مجنون
هيِّ
متل شي خط بريشة قصب
وهوِّ
متل حرف العرب
مرفوع بالضمة
منصوب بالفتحة
وبالفتحة هرب
بس يكتروا ببالُه
بيصير واو ونون
وبس يسكن بحاله
بيصير همزة
أو بيصير سكون
قرآن مفتوح بهدا
متل المصلّاية
نقول شي سورة هيّنة
تنْبلش قراية
وعبله على ضهر الفرس
حلوة متل آيه
كل الحروف منكّسِة
الله شو حلوة الألف
بس تنحكى حكاية
سبعة لغات العرب
عمدي مخبّاية
ع كتر ما القوس انحنى
صار السهم غاية
هـ الأرض
اسوارة دهب
زينة مضوايّة
جبلي بطريقك حلق
إدْني .. معرّايه
وصّيت صايغ حلب
قَللي الحلق جايي
وضاعت يا مين يلاقيا
وياخد هـ المراية

حصان
ما تقول غاب القمر
قول العباية ليل
لو كان عندي قمر
لاسْرِج صهيل الخيل

طقس طلال
بيتي
متل ورقة احترق
ما عندي أهل
شبهتك بهالسهل
بقرص العسل
عملو ع مهلُه النحل
شبهتك بحالك
بالعمر
ماشي وراك يلملم خيالك
وجِّك طقس متل الصحو
دايخ ومش سكران
متل الشتي
نازل على حزيران
شبهتك بقوس القدح
جايي على لبنان
وجِّك وطاف النيل
غرَّق مصر
في مملكه عم تنسرق
مفتوح باب القصر
وجِّك
من هون بيحدوا الشتي
ومن هون حَدّه التلج
وشاعر
حمل حاله بها الموت وحده وهج
شبهتك بكل الدني
من بعدِك عليها السلام
بس تفرحي
بيطير من صدري الحمام
وبس تزعلي
ع مصر باخدلك الشام
ملك الزمان
خلّيهن يبيعوا ولاية اصفهان
يبيعوا
أرز لبنان
والأرجوان البين صيدا وصور
يبيعوا السبع بحور
ويشتروا مطرح أمان
للأميرة
الإسمها نزهة زمان
قولوا لأهل الشام
يسكروا سواق المدينة شهر
قولوا
لوالي مصر
خللي بناتن
ترسم مناماتن
تلوِّن ازاز القصر
خلوا حدا
يودي خبر رايح من اسطنبول
ويقلّهُن
تيأدنوا بالميدنة
الله شو حلوة الدني
وشو هـ العروس
الأسمها من حروف كُلا مسكّنه
يا الله اهْرُبي
جايي الصبي يشعل طراف الأرض
يلملم خطوط الطول
يمحي خطوط العرض
والأرض
وقفت بالفضا
وما بقي من العمر أكتر ما مضى
وكل شي بيجي اسمُه انقضى
يا عمر ع مهلك
بعد عندي فرح
وبعدين لاحق نستريح
ون مان تعّبنا السفر
بيحزن بساط الريح
ف
لو عندي محارم سودا
لشوشح فيها وودّعكن
جايب ندّابة البقاع
ينوحوا تحت قناطركن
ون رحتوا
لاحرق هـ البيت اللي قبالي
وبخاطركن
وأنا لاطلع ع الموت العالي
وأدلق ع الموت
محابركن
كِنا زغار
وصوتك يللّي ندهني
من عز النوم
كسر العمر
وصحّاني
وهبط هـ النوم
وفتح الجرح اللي بقلبي
بضربة سكين
وحكالي عن فلسطين
وجّك برج
وعمّرته وعبّيته سلاح
وجّك كبش
فزعان وعم يصرخ وحش
وجّك يا فلسطين إزاز
خاتم دهب وعُليّه وصندوق جهاز
زجّك سرقة البساتين
سحر النوم اللي قبالي
زجّك هـ الباب العالي
وجّك رعيان
و انت كتاب الحكايا
و ملك الزمان
انت الوشم
ع ايدين العرب
النَّوَرْ ، الضاعوا بها العتم
انتِ الرعد العم يقصف بحبل الرعد
وانت البرج اللي جايي
وما تعمر بعد
زمن البكي جايي ع كل البيوت
فتحي يا قدس بوابك
قوليله يفوت
يا هـ الساكن بين الصوت
و بين الصدى
يا هـ البلاد إلما إلها حدا
انت ميال بها الشمس
وانت المدى
أنا سامع صوتك جايي و مبحوح الصوت
أنا شفتك
راكض حافي ع حدود الموت
قالولي
انك راجع مع زهر اللوز
قالولي
انك راجع بقطاف الجوز
قالولي
انك جايي بنبيذ العيد
جايي بفرح البواريد
قالولي
انك راجع مع دهب الارض
قالولي
انك راجع ع حصان البرد
راجع ...قالولي راجع ...راجع تخمين
متل زلاغيط العرس
البفلسطين

في مرفأ عينيك الأزرق
أمطار من ضوء و دموع
وشموس وقلوع
ترسم رحلتها للمطلق
في مرفأ.....
أركض كالطفل على الصخر
استنشق رائحة البحر
وأعود كالطفل المرهق
نزار قباني
بنت حلوة
رسملي بنت حلوه
متل شي ميدنه
وخبي الأدان بجيبتا
ورسوم صبح
ونطره ع السطر
ما يخلي حدا يتنقوز عليها بدواير غيبتنا
وركوض
في همزه بطرف هـ الخيط
أوعا تفلتا
غط القلم بالبحر
مي كتير
لون نومتا
وطير مراكب بالهوا
وخدلك شي غفوه بدروتا
وفتح شي قوسين
متل بنتين استحوا
وشي أرض فاضت ميتا
ورسوم بيت وباب
متل خزانة عصافير طارت درفتا
وأد مافيك
شبابيك العين وسع فتحتا
تأنى
ع شو مستعجل ؟
تأنى على العتبه
رسمها كرز
تنشوف بلكي قطفتا
ع روس صابيعا
إجت ...
ع الزيح نسيت دعستا
فاقت ع قصة بتنتهي بالله...
ورجعت نسيتا
وداروا طواحين الهوا
ب عن لما حكيتا
هب الهوا
تهدى
رح تطير النقط
ويمكن تشتى ساعتا
وتركض على قوس القدح
غزلان قشعت ميتا
كان النعس بستان
عيت سلتا
رفع الخط شوي
أحلى الخيرزان
ويا عين شو حلو النعس غفيان
حط الارض ع الدفتر
وجر القلم ع دورتا
بيوقع برتقان القمر
ع النوم فوق مخدتا
برمت الارض كتير
يمكن حاجتا ...
صاروا الزنابق حدنا يعلوا..
ولو ضل كان الورد غطاني
ويمي ما بعرف كيف حكاني
ميم
ما لحقت قلن بعد بسم الله
تا خلصت الآيه
تركت خلفي الميم
ومشيت لحالي
طول الطريق
البين رحمن ورحيم
جنون أول
وتلات تفريدات لرامي
عرس الألف
رسموا الصوت ع الكف
وحنوا صبيع اللغه بالخط حرف و حرف
دار العرس
خشخش بسهرات الالف هـ الدف
وال ح لفت ع الخصر زنارها
لمن حبيبا لف
في حرف دق وفات
وقعوا حروف العطف
والدال فتحت دارها
تستقبل بزوارها
والها قلبا هف
رقصت وداخت بالهوا لحالها
والكاف تزقف كف
شمل اللغه ما بيجمعه
إلا المشي ع المي
لأنه أخف
تفريد أول
على جنون رقم واحد
يا من شفلي بو لهب
ومرته معه
محمل على ضهرا حطب
بردان عميوقد عرب
تفريد ثاني
على جنون أول
الليمون ما بدو سجر
منه لحاله سكون
مدور متل نجمه على قد القمر
وسهران مع عين العيون ....
تفريد تالت
ما بين يثرب ومكه
ضيعت صرة دهب
بيناتهن اسوارتين
بيشبهوا خطين
متلن ما انكتب
بيسوودموع العين
ع فد ماحلوين
بتقول ما خسروا العرب ...
ما السعادة في الدنيا الا شبع فإن صار جسما مله البشر جبران
من بياع الزمان
آن الأوان
فوتي على خيالك
تاسكر عليك
قاعد بالمرايه
اتنوقص عليك
وجك
سفر العسكر
متل الخنجر
متل القدس وعم تتسكر
قوليلهن إني أنا خيالن
رح اسكن بها النوم
واتخايل قبالن
راحت اساميهن وبقيت هـ الحجار
كبروا اللي بدن يكبروا
وولاد بقيوا زغار
وقت الزمان
لعلي
قاسوا الوقت بالرمح طلع الليل
أطول بفرق الصبح
هي وعم تخيل على ضهر الفرس
استحلت يكون في نهر
بدل الزمان تنين
وقف الزمان قبالها
والناس ع الميلين
وخيالها مانع حدا
يمرق ولونو ببالها
وقرب يصير العصر
وبالعبي في نسوان
عم يكتبو لا حجاب
وبعد بدن سطر
صابو هوس
قللا : شو حلوه هـ الفرس
وقالوا الحكيولي هـ الحكايه
كل ما تطلع بالسما
تصير السما مرايه
ويطلع معه بها الشعر
ويضيف بها الحبر
حط الارض والشمس
صار بالدوايه همس
وحطلهنايام
نزل الحبر ع الدوايه
سكر ع حاله ونام
من بياع الزمان ل آن الأوان
قللو الجرس للصوت
خدني معك
ع مين تاركني
قللو
أنا هربان من هـ الموت
والموت لاحقني
وما عاد رجع الصوت
آن الأوان
لزين العابدين
حلوه متل قبل الشتي
وبعد الشتي بشوي
إنت وعم تغطي المسافه بالوقت
بللي طرافن مي
لمن مرق
قالوا خياله وصلوا وعم يسالوني عليك
بطلع
اللي قبل منه مش إلو
والبعد منه جنان
ما عاد إلا يسألوا
مين الحكوا عنه بكان يا مكان
كل ما خلص بيرجع كأنه باوله
وجايب معه الوان
يزيح دواير مش إلو
بدفاتر الصبيان
دويرتين بينتلوا بس ينسقى البستان
ودويرتين بينزلوا
دراج الفلك رمان
لا في فراغ ولا فضا
الدنيي بحيره فاضيه
بحدها آن الأوان
أول ما دارت هـ الأرض
ما كان إلها أمان
وبعدين شفتا واختفت
بسورة الرحمن
قبل اللغه ما تنكتب
كان الحرف بردان
حلوه اللغه حلوه
شو بدنا بالحكي
والصوت بنديره
على سطح الاوان
من بياع الزمان لـ
آن الأوان
إيديك مسكونين
وجّك مضوّا بسنابل قمح
مضوّا بالعصافير
مسيّج بالبساتين
مقطوف قبل الصبح
ومرمي بقلب البير
كحل العين
إلي
هـ الأرض جايي مدودخة
بتهزّ ع الميلين
ع كثر ما هي خفيفة
بيحملوها تنين
وزغيّرة طير الحمام بيقطعها بيومين
ع قد منّا زغيّرة
خمنتها بعدين
جبتلها شمس وقمر من سكّر
ونجكات زرقة معلّقة
بترد عنها العين
ع قد ما سُكّرا حٍلُو
بيلبقلها اسمين
دقت على باب الزمان
مضيّعة ليلين
تَتِسْألواْ ن كنن إلو
قام ضيّفا نهارين
وقللي الزمن ما تقلّها
صاروا كحل بالعين
زهر الروح
إلى ساحة الكونترا سكارب

ونزلت بستان قطّفلك زهر يا روح
وجبتلك منامات
أحلى من قمر مفتوح
عرفتا رح تشتي الدني من صوتها المبحوح
خمّنت انه منام
قرّبت وعّيها
نقز مني الحمام
تفاحة الأرض
كانت ع سجر من نور
لمن قطفت الأرض
صارت لحالا تدور

فقير الله
وحياة روح العشب
وحياة روح المي
يشهد علي السجر
ولو كان تحته فيّ
لارسملك الشمس
ع صفحة سما زرقة
وشفلي فقير
يخرطش على طرافا شوي

غياب
كسوف فوق سهل البقاع
جميلة كأطفال حفاة في السهل
وعالية متل حط الشمالي بوجهك
مبحوحة كأصوات تقع في أول الذاكرة
بيضاء كتفاح أبيض في النوم
تطلع كأنها آتية من الماء
وتغيب
كإسوارة من ذهب
مسروقة على الطريق
غنّت
فرنّ سرْج من الفضة على فرس زرقاء
ومشت
فماد هودج بعروس مخضوبة بالحناء
رقصت فمدت جميع النساء راحاتها لتشرب
الماء
ضحكت فانكسر إناء النهار
وذبلت
فحزنت أسماء الأناجيل
الأرض برتقالة ووجُهكِ النيل بلا مياهٍ

عاصي
إلى زياد الرحباني
إذا بدا لكم أن الصوت بعيد
فاحذروا
أن يؤذن له بالدخول
وأنتم غياب
كان جميلا ككنيسة شرقية
مزيّنة بصياح الديك
حكموا بالنفي على جميع الأحزان
فطارت يمامة من القلب
وتزينت الأيام بنهار الجمعة
كان صافيا كجميعكم
لم يعد أحد بين يديه صينيّة الدخول
يا حزينا كغربة إلى الأبد
الأرض تدور مرة واحدة
ذهب الوقت الأول
لا أحد سوف يكشف السر
الزمن السعيد
الحاضر المزين بمجيئك فجأة
الماضي الداخل إلينا منذ لحظة
في طريقه إلى المستقبل
الضعفاء يضعفون لأنهم لا يعملون
كم ستكون جميلا طيلة أيام الصيف
يداه مطبقتان على نجمة
والنجمة فرحانة كنقطة تفر من السطر
الانتظار يسرق الإيمان
لكن إيمانه سرق الفاجعة
الذي لا يموت
لا يمكن أن يكون وحيدا
طوبى للذين لا يموتون
البزق يقيم لك قداسا في ساحة القلب
الريح وحلفاؤها يناولونك
القربان المقدس
و إنت
وحيدة بين النساء
من أين نأتي لك بهذه الأحزان
مرة ثانية .....